၇။ လူသားတို့၏ သဘာဝ

 ၇။ လူသားတို့၏ သဘာဝ

ယောက်ျားနှင့် မိန်းမတို့ကို ဘုရားသခင်၏ ပုံသဏ္ဌာန်တော်နှင့်အညီ တစ်ဦးချင်းစီ၏ ကိုယ်ပိုင်အမှတ်လက္ခဏာ၊ စဉ်းစားနိုင်ခြင်းနှင့် ပြုလုပ်နိုင်ခြင်းဆိုင်ရာ စွမ်းအားနှင့် လွတ်လပ်ခွင့်တို့ဖြင့် ဖန်ဆင်းတော်မူခဲ့သည်။ လွတ်လပ်သောသတ္တဝါများအဖြစ် ဖန်ဆင်းခံရသော်လည်း တစ်ဦးစီသည် ကိုယ်ခန္ဓာ၊ စိတ်နှင့် ဝိညာဉ်တို့၏ ခွဲခြား၍မရသော တစ်စုတစ်စည်းတည်းဖြစ်ပြီး အသက်၊ အသက်ရှူခြင်းနှင့် အခြားအရာအားလုံးအတွက် ဘုရားသခင်အပေါ် မှီခိုကြရသည်။

ကျွန်ုပ်တို့၏ ပထမမိဘများသည် ဘုရားသခင်ကို မနာခံသောအခါ ကိုယ်တော်အပေါ် မိမိတို့၏မှီခိုမှုကို ငြင်းပယ်ခဲ့ကြပြီး မိမိတို့၏ မြင့်မြတ်သောအဆင့်အတန်းမှ ကျဆင်းခဲ့ကြသည်။ သူတို့၌ရှိသော ဘုရားသခင်၏ပုံသဏ္ဌာန်သည် ပျက်စီးယိုယွင်းသွားပြီး သေခြင်း၏ လက်အောက်သို့ ကျရောက်ခဲ့ကြသည်။

သူတို့၏သားစဉ်မြေးဆက်တို့သည်လည်း ဤကျဆင်းသွားသောသဘာဝနှင့် ၎င်း၏အကျိုးဆက်များကို အမွေခံကြသည်။ သူတို့သည် အားနည်းချက်များနှင့် မကောင်းမှုသို့ ဦးတည်သောသဘောထားများဖြင့် မွေးဖွားလာကြသည်။ သို့သော် ဘုရားသခင်သည် ခရစ်တော်အားဖြင့် လောကကို မိမိနှင့် ပြန်လည်သင့်မြတ်စေတော်မူပြီး၊ မိမိ၏ဝိညာဉ်တော်အားဖြင့် နောင်တရသော သေမျိုးတို့၌ သူတို့၏ဖန်ဆင်းရှင်၏ ပုံသဏ္ဌာန်ကို ပြန်လည်တည်ဆောက်ပေးတော်မူသည်။ ဘုရားသခင်၏ ဘုန်းတော်အတွက် ဖန်ဆင်းခံရသော သူတို့သည် ကိုယ်တော်ကိုလည်းကောင်း၊ အချင်းချင်းကိုလည်းကောင်း ချစ်ရန်နှင့် မိမိတို့၏ပတ်ဝန်းကျင်ကို စောင့်ရှောက်ရန် ခေါ်တော်မူခြင်းခံရကြသည်။

(က၊ ၁:၂၆–၂၈၊ ၂:၇၊ ၁၅၊ ၃၊ ဆာ၊ ၈:၄–၈၊ ၅၁:၅၊ ၁၀၊ ၅၈:၃၊ ယေ၊ ၁၇:၉၊ တ၊ ၁၇:၂၄–၂၈၊ ရော၊ ၅:၁၂–၁၇၊ ၂ကော၊ ၅:၁၉၊ ၂၀၊ ဧ၊ ၂:၃၊ ၁သက်၊ ၅:၂၃၊ ၁ယော၊ ၃:၄၊ ၄:၇၊ ၈၊ ၁၁၊ ၂၀။)

 

ကယ်တင်ခြင်း

မြေကြီးကို မဖန်ဆင်းမီကတည်းက ကောင်းမှုနှင့် မကောင်းမှုတို့အကြား စစ်ပွဲရှိခဲ့သည်။ တစ်ချိန်က ပြည့်စုံ၍ အလွန်ဂုဏ်အသရေရှိသော သတ္တဝါဖြစ်ခဲ့သည့် လူစီဖာသည် ဘုရားသခင်ကို မနာလိုဖြစ်လာပြီး ပိုမိုမြင့်မားသော အဆင့်အတန်းကို အလိုရှိခဲ့သည်။ ဘုရားသခင်သည် သူအလိုရှိသည့်အရာကို မပေးသောအခါ သူသည် စာတန်ဖြစ်လာခဲ့သည်။ သူသည် ဘုရားသခင်သည် မတရားကြောင်း စွပ်စွဲခဲ့သည်။

ထို့နောက် စာတန်သည် ကောင်းကင်တမန်တို့၏ သုံးပုံတစ်ပုံကို လမ်းလွဲစေခဲ့ပြီး ဘုရားသခင်သည် သူတို့ကို ကောင်းကင်မှ နှင်ထုတ်တော်မူခဲ့ရသည်။ ဘုရားသခင်ကို လက်စားချေရန် စာတန်သည် ကိုယ်တော်၏ အဖိုးတန်သော အသစ်ဖန်ဆင်းခြင်းဖြစ်သည့် မြေကြီးကို စတင်တိုက်ခိုက်ခဲ့သည်။ လူသားတို့သည် လွတ်လပ်စွာရွေးချယ်နိုင်သော အခွင့်ရှိ၍ ဖန်ဆင်းခံရကြောင်း သိရှိသောကြောင့် သူတို့ကို ဘုရားသခင်၏ မေတ္တာပြည့်ဝသော လမ်းညွှန်မှုကို ပုန်ကန်ရန် သွေးဆောင်ခဲ့သည်။

သို့သော် ဤအရာသည် လူသားတို့၏ ဇာတ်လမ်းအဆုံးသတ် ဖြစ်စရာမလိုကြောင်း ဘုရားသခင် သိတော်မူခဲ့သည်။ လူသားတို့အစား အသေခံရန်နှင့် အပြစ်ကြောင့် ဖြစ်ပေါ်လာသော အဆုံးစွန်သော ပြစ်ဒဏ်ကို ခံယူရန် မိမိ၏သားတော် ယေရှုခရစ်ကို စေလွှတ်ခြင်းအားဖြင့် ကိုယ်တော်သည် ကျွန်ုပ်တို့ကို မည်မျှချစ်တော်မူကြောင်း ပြသတော်မူခဲ့သည် (ရော၊ ၆:၂၃၊ ယော၊ ၃:၁၆)။

သို့သော် နောက်ဆုံးတွင် ရွေးချယ်မှုနှင့်ပင် သက်ဆိုင်နေဆဲဖြစ်သည်။ ဘုရားသခင်သည် အတင်းအကျပ် သစ္စာခံစေခြင်းကို မည်သည့်အခါမျှ အလိုတော်မရှိခဲ့ပါ။ ရွေးချယ်မှုသည် ကျွန်ုပ်တို့၏ လက်ထဲတွင်ရှိသည်။ ကျွန်ုပ်တို့သည် အပြစ်၏လက်အောက်သို့ ကျရောက်၍ မိမိတို့အတွက် အသက်ရှင်ရန် ရွေးချယ်နိုင်သကဲ့သို့၊ ယေရှု၏ အနစ်နာခံမှုကို လက်ခံပြီး ကိုယ်တော်နောက်သို့ လိုက်ကာ ကိုယ်တော်ကို သိကျွမ်းရန်လည်း ရွေးချယ်နိုင်သည်။ ကျွန်ုပ်တို့သည် ကိုယ်တော်ကို ရွေးချယ်ပါက ကိုယ်တော်သည် မိမိ၏သန့်ရှင်းသောဝိညာဉ်တော်အားဖြင့် ကျွန်ုပ်တို့ကို လမ်းညွှန်ပေးမည်ဖြစ်ပြီး မည်သည့်အခါမျှ စွန့်ပစ်တော်မူမည်မဟုတ်ကြောင်း ကတိပြုတော်မူသည်။

အောက်ပါဖော်ပြချက်များသည် ကောင်းမှုနှင့် မကောင်းမှုတို့အကြား ရုန်းကန်မှုနှင့် ယေရှုခရစ်၏ ချစ်ခြင်းမေတ္တာပြည့်ဝသော အနစ်နာခံမှုအားဖြင့် လူသားတို့၏ ကယ်တင်ခြင်းအတွက် မျှော်လင့်ချက် ရှိနေဆဲဖြစ်ကြောင်းနှင့်စပ်လျဉ်း၍ သတ္တမနေ့မြော်လင့်ခြင်းအသင်းတော်၏ ယုံကြည်ချက်များကို ဖော်ပြထားသည်။